Cynllun Cyn-Adneuo (Strategaeth a Ffefrir)

7 Y Strategaeth a Ffefrir

Mireinio'r Strategaeth a Ffefrir

7.1 Mae'r Strategaeth a Ffefrir ar gyfer yr 2RLDP yn hybrid rhwng 3 opsiwn gwahanol. O ganlyniad, mae angen mireinio'r strategaeth i nodi'r elfennau o bob opsiwn strategaeth a fydd yn cael ei gyfuno i gyflwyno strategaeth gyffredinol a chydlynus ar gyfer y cynllun.

Ardaloedd o Dwf

7.2 Mae'r Strategaeth a Ffefrir wedi'i dylanwadu'n drwm gan ddau opsiwn strategaeth penodol sy'n cydymffurfio ag ystyriaethau polisi a amlinellwyd yng Nghymru'r Dyfodol, sef Opsiwn 4: Ffocws Buddsoddiad y Metro (Polisi Cymru'r Dyfodol 12 – Cysylltedd Rhanbarthol, Polisi 36 – Metro'r De-ddwyrain), ac Opsiwn 5 – Canol Trefi yn Gyntaf (Polisi Cymru'r Dyfodol 6 – Canol Trefi yn Gyntaf).

7.3 Mae Ffocws Buddsoddiad y Metro yn gofyn i ddatblygiad gael ei leoli'n agos i gysylltiadau trafnidiaeth cynaliadwy, yn bennaf prif orsafoedd bysus a rheilffyrdd ar draws y Fwrdeistref Sirol. Lleolir y gorsafoedd rheilffordd yn y Fwrdeistref Sirol ar Linell Cwm Rhymni, sy'n rhedeg ar hyd ochr orllewinol y Fwrdeistref Sirol o Gaerffili i Rymni, a Llinell Glyn Ebwy sy'n rhedeg ar ochr ddwyreiniol y Fwrdeistref Sirol o Risca i Drecelyn a Chrymlyn. Dylid nodi nad yw Coed Duon wedi'i lleoli ar linell rheilffordd ac er bod Nelson ar linell Cwmbargoed, nid oes ganddi wasanaethau i deithwyr. Fodd bynnag, mae gan y ddwy ganolfan bysus a fyddai'n eu cynnwys o dan ffocws y Metro. Yn ogystal â'r ddwy ganolfan hon, mae gan Fargoed a Caerffili orsafoedd bysus hefyd.

7.4 Mae'r Polisi Canol Tref yn Gyntaf yn ceisio lleoli datblygiad mewn ac yn agos i drefnu a dinasoedd presennol ar draws y rhanbarth. O ran y Fwrdeistref Sirol, mae hyn yn golygu lleoli datblygiadau'n agos iawn i Brif Ganolau Trefi'r Fwrdeistref Sirol a'i Chanolfannau Lleol.

7.5 Mae gan y Prif Ganolau Trefi a Chanolfannau Lleol oll orsafoedd rheilffyrdd a bysus mawr, ac eithrio Bedwas sy'n agos iawn i Gaerffili ac, felly, mae'r ddau opsiwn yn nodi gofyniad i nodi twf a datblygu newydd yn agos i'r canolfannau hyn.

7.6 Fel arfer, byddai'r cynllun yn nodi meysydd strategaeth lle bydd disgwyl lefelau penodol o dwf a datblygiad. Fodd bynnag, nid yw natur linellol y gorsafoedd metro a dosbarthiad prif ganolfannau a chanolfannau lleol yn ei gwneud hi'n hawdd creu ardaloedd o strategaeth ofodol gydlynol. O ganlyniad, nid yw'r Strategaeth a Ffefrir yn nodi ardaloedd strategaeth ofodol yn y Fwrdeistref Sirol.

7.7 Heb ardaloedd strategaeth ofodol ddiffiniedig, caiff dosbarthiad datblygiadau newydd ei ddiffinio o amgylch y Prif Ganolfannau 'r rhai Lleol, sydd wedi'u nodi yn yr Hierarchaeth Anheddiad.

Y Safle Strategol

7.8 Y mater nesaf i'w ystyried yw a ddylai'r strategaeth nodi safle strategol, h.y. safle a fyddai'n hanfodol i gyflwyno'r strategaeth oherwydd ei faint ac y byddai unrhyw fethiant o ran cyflwyno'n tanseilio cyflwyno'r strategaeth. Dim ond un safle o arwyddocâd a gyflwynwyd i'r Cyngor i'w ystyried o dan y broses Safleoedd Ymgeisiol, a hwnnw yw safle Parc Gwernau ym Maes-y-cwmwr. Mae'r safle'n cynnwys 212 hectar o dir i ochr ddeheuol anheddiad presennol Maes-y-cwmwr ac mae'n gallu cynnig lle i oddeutu 2,700 o anheddau gydag isadeiledd atodol a chyfleusterau cymunedol. Elfen allweddol o'r safle yw darpariaeth ffordd mynediad newydd a fydd hefyd yn darparu gwelliant i brifffordd strategol i liniaru problemau tagfeydd ar yr A472 drwy Faes-y-cwmwr.

7.9 Mae safle Maes-y-cwmwr yn safle mawr iawn mewn perthynas â datblygu yn y Fwrdeistref Sirol a byddai'n afrealistig cynig y dylid cyflawni'r holl ddatblygiad o fewn cyfnod y cynllun 2RLDP. O ganlyniad, byddai angen cyflawni'r safle dros gyfnod ddau gynllun datblygu. Golyga hyn, os caiff ei nodi yn y cynllun, bydd angen i'r 2RLDP nodi'r ganran o'r safle i'w gyflawni hyd at 2035 a bydd y gweddill yn cael ei gyflawni'n unol â'r cynllun dilynol.

7.10 Y cwestiwn yw a ddylai'r Strategaeth a Ffefrir nodi lefel sylweddol o ddatblygu a fyddai'n cyfrif fel safle strategol, y byddai'n tanseilio cyflawniad y strategaeth os na fyddai'n cael ei gyflawni, neu a ddylid nodi lefel is o ddatblygu a fyddai'n golygu nad yw cyflawni'r strategaeth yn gwbl ddibynnol ar y dyraniad yn mynd rhagddo yn ystod cyfnod y cynllun. Mae'r strategaeth hybrid yn cynnwys Opsiwn Safle Strategol fel rhan o'r Strategaeth a Ffefrir gyffredinol ac felly dylid cynnwys y safle ym Maes-y-cwmwr yn yr 2RLDP.

7.11 Mae gan ddull cyllido'r ffordd oblygiadau sylweddol o ran sut caiff y datblygiad ei gynllunio o ran camau a'u cyflawni ac, yn hollbwysig, ar ba adeg y caiff datblygiad y ffordd fynediad ei gyflawni'n llawn. Byddai'r opsiwn cyntaf, lle byddai'r Cyngor yn darparu cyllid i gyflawni'r ffordd ar ddechrau'r datblygiad, yn ei gwneud hi'n bosib cyflawni'r datblygiad wrth symud yn gyffredinol o'r gogledd i'r de, gyda'r fantais o'r ffordd yn ei lle o ddechrau'r datblygiad, gan ddarparu gwelliant strategol o'r dechrau.

7.12 Byddai'r ail opsiwnn, gyda chyllid ar gyfer y ffordd yn deillio'n gyfan gwbl o'r datblygiad, yn golygu y byddai angen cyflawni cydran uchel o'r datblygiad cyn creu'r cyfalaf angenrheidiol o'r cynllun i gyflawni'r ffordd yn ei chyfanrwydd. Yn yr opsiwn hwn, mae'n debygol y byddai'r datblygiad yn dechrau ar bennau gogleddol a deheuol y datblygiad arfaethedig a byddai gwaith datblygu yn mynd yn ei flaen o'r ddau ben ac yn cwrdd yng nghanol y safle ar ddiwedd y datblygiad. Byddai hyn yn arwain at oblygiadau penodol ar gyfer darpariaeth y ffordd oherwydd byddai'n anhebygol o gael ei chyflawni tan gamau terfynol y datblygiad, ac o bosib y tu hwnt i gyfnod y cynllun 2RLDP. Byddai hefyd yn golygu y byddai'r rhaid i'r datblygiad gynnig lle i'r traffig ychwanegol a grëir ar y rhwydwaith trafnidiaeth presennol, gan roi straen ychwanegol ar y rhwydwaith presennol, lle byddai angen gwneud gwelliannau i'r rhwydwaith priffyrdd strategol.

7.13 Byddai nodi safle Maes-y-cwmwr fel Safle Strategol yn galluogi'r 2RLDP i nodi lefel uwch o lawer o ddatblygu ar y safle na phe tai'r safle'n cael ei gynnwys fel dyraniad arferol. Mae darpariaeth lefel uwch o ddatblygiad yn golygu y byddai mwy o'r manteision i'r gymuned a'r isadeiledd yn cael eu cyflawni yn ystod cyfnod y cynllun, gan fod y fantais i breswylwyr presennol a newydd Maes-y-cwmwr yn gynharach yn y datblygiad.

7.14 Wedi pwyso a mesur, yr ymagwedd orau ar gyfer y safle yw cyflawni cymaint o'r datblygiad ag sy'n rhesymol yn ystod cyfnod y cynllun. Mae'r senario hwn yn darparu'r manteision mwyaf o'r safle yn ystod cyfnod y cynllun, gan gyfrannu'n sylweddol at gyflawni'r gofynion aneddiad yn ogystal â darparu isadeiledd a gwelliant i'r rhwydwaith priffyrdd strategol a fydd yn cynorthwyo symudiadau bysus drwy Faesycwmwr. Felly, bydd yr 2RLDP yn neilltuo safle Maes-y-cwmwr fel Safle Strategol i gyflawni oddeutu 1,200 o aneddau (allan o gyfanswm o oddeutu 2,700 o aneddau) yn ystod cyfnod y cynllun. Yn ogystal, bydd y safle'n cael ei nodi yn y Strategaeth a Ffefrir fel Safle Strategol.

Materion Defnyddio Tir Allweddol

7.15 Mae Pennod 3 yn amlinellu'r materion defnyddio tir allweddol y bydd yn rhaid i'r 2RLDP fynd i'r afael â nhw er mwyn i'r cynllun fod yn llwyddiannus. Mae'r Polisïau sy'n dilyn yn adlewyrchu'r prif faterion strategol sy'n wynebu'r Fwrdeistref Sirol ac yn darparu fframwaith polisi cyffredinol ar gyfer mynd i'r afael â nhw.

7.16 Mae'r mater o newid yn yr hinsawdd a'i oblygiadau yn ystyriaeth allweddol ar gyfer unrhyw gynllun datblygu a lliniaru effeithiau newid yn yr hinsawdd yn ogystal â lleihau allyriadau sy'n cyfrannu tuag at newid yn yr hinsawdd

7.17 Mae dadgarboneiddio, fel mesur i fynd i'r afael â'r hyn sy'n cyfrannu at gynhesu byd-eang a lliniaru yn erbyn ei effeithiau, yn llinyn allweddol ym mholisi Llywodraeth Cymru ar ddatblygu. Mae creu ynni o ffynonellau adnewyddadwy a dim carbon yn rhan hanfodol o gyflawni dadgarboneiddio. Mae Cymru'r Dyfodol yn ei gwneud hi'n ofynnol i'r Cyngor fod yn rhagweithiol wrth gyflawni dull o greu ynni adnewyddadwy ac yn nodi Ardaloedd Cyn Asesu ledled Cymru lle mewn egwyddor, mae ynni'r gwynt yn dderbyniol a lle mae'r egwyddor o newid tirwedd yn cael ei derbyn. Ar raddfa fwy lleol, bydd y Cyngor yn cefnogi ac yn annog cynlluniau priodol ar gyfer creu ynni adnewyddadwy a bydd hefyd yn gweithio ar y cyd â darparwyr ynni i gyflawni'r cynlluniau priodol. I adlewyrchu hyn, mae'r Strategaeth a Ffefrir yn cynnwys polisi i gefnogi darpariaeth ynni adnewyddadwy.

7.18 Mae cyflawni Datblygu Cynaliadwy yn ddyletswydd i bob awdurdod lleol ledled Cymru. Mae datblygu cynaliadwy a chreu lleoedd cynaliadwy yn hybu ffyrdd o fyw sy'n actif ac yn iach ac yn cyfrannu'n sylweddol at lesiant. Mae cyflawni datblygu cynaliadwy wedi'i ategu gan greu lleoedd, a chaiff y cynllun ei ategu gan egwyddorion creu lleoedd cadarn.

7.19 Mae rhwymedigaeth y Cyngor i gyflawni dyletswydd o fioamrywiaeth a dyletswydd i gyflawni datblygu cynaliadwy yn golygu bod isadeiledd gwyrdd a glas yn ystyriaeth bwysig mewn unrhyw gynigion datblygu a rhaid bod yn elfen hanfodol o'u cynllunio. Rhaid i'r Cyngor gynnal a gwella isadeiledd gwyrdd a glas yn ei benderfyniadau a bydd yn rhaid i'r 2RLDP sicrhau bod gwella isadeiledd gwyrdd a glas wrth wraidd y cynllun. O ganlyniad, mae'r Strategaeth a Ffefrir yn amlinellu'r polisi trosfwaol y caiff polisïau manwl eu cyflwyno ar ei sail drwy'r 2RLDP Adnau i gyflawni dyletswyddau'r Cyngor. Felly, bydd yn rhaid i ddatblygwyr ddangos bod cyfleoedd ar gyfer isadeiledd gwyrdd a glas wedi cael eu mwyafu fel rhan o unrhyw gynigion datblygu.

7.20 Cyflogaeth yw'r prif fater y bydd yn rhaid i'r 2RLDP fynd i'r afael ag ef i gyflwyno'r Strategaeth a Ffefrir, sy'n seiliedig ar y Fwrdeistref Sirol yn cyflawni twf yn y boblogaeth ac, yn benodol, y boblogaeth economaidd, er mwyn bod mewn sefyllfa i gyflawni targedau Prifddinas-ranbarth Caerdydd o gyflwyno twf o 3.7% mewn swyddi (sef 25,000 o swydd newydd yn y rhanbarth). I wneud hyn, bydd yn rhaid i'r 2RLDP nodi tir ar gyfer datblygu cyflogaeth a fydd yn helpu i fynd i'r afael â phwysau economaidd sydd wedi deillio o effeithiau Covid-19, Brexit a newidiadau naturiol yn yr economi y disgwylir iddynt gael effaith andwyol ar sector cyflogaeth mwyaf y Fwrdeistref Sirol, sef gweithgynhyrchu. Yn ogystal, bydd yr 2RLDP hefyd yn ceisio ehangu a gwella canol y dref a chynnig i ymwelwyr i gynorthwyo wrth greu twf economaidd ar gyfer y Fwrdeistref Sirol.

7.21 Mae twristiaeth yn gwneud cyfraniad pwysig i'r economi leol, ac mae buddsoddiad sylweddol wedi'i gynllunio i wella'r cynnig i dwristiaid yn y Fwrdeistref Sirol. Mae gweithgareddau adfywio'n canolbwyntio ar wella twristiaeth yn gyffredinol, ynghyd ag ehangu ac annog gweithgareddau sy'n gysylltiedig â thwristiaeth a datblygu llety i ymwelwyr. Elfen allweddol o gyflwyno cynnig gwell i ymwelwyr yw cynyddu hygyrchedd drwy gludiant cynaliadwy, gan gynnwys gwelliannau i'r Metro a gwelliannau llesol lleol sy'n cysylltu asedau twristaidd.

7.22 Mae'n hanfodol bod yr 2RLDP yn darparu tai digonol, o'r math, maint a fforddiadwyedd priodol a'r lleoedd iawn i'w gwneud hi'n bosib i'r Fwrdeistref Sirol ddenu a chynnal y lefel o dwf poblogaeth a fydd yn cefnogi ac yn gwireddu uchelgeisiol y cynllun.

7.23 Rhaid i'r 2RLDP ddarparu tir preswyl digonol i ddiwallu anghenion tai fforddiadwy a marchnad y cymunedau yn y dyfodol. Mae'r Strategaeth a Ffefrir yn cefnogi gofyniad tai o 6,750 annedd dros gyfnod y cynllun, neu 450 annedd y flwyddyn, yn seiliedig ar senario twf poblogaeth oedran gweithio Prifddinas-ranbarth Caerdydd. Dyma senario a arweinir gan anheddau a fyddai'n cefnogi twf yn y boblogaeth o oedran gweithio ar lefel a fyddai'n cyd-fynd ag uchelgeisiau twf economaidd Prifddinas-ranbarth Caerdydd a fyddai'n gofyn am lefel o dai sy'n realistig ond yn uchelgeisiol mewn perthynas â thueddiadau'r gorffennol, gan atgyfnerthu safle Bwrdeistref Sirol Caerffili mewn Ardal Dwf Genedlaethol yng Nghymru'r Dyfodol a chynorthwyo cyflawniad tai fforddiadwy. Mae'r Papur Opsiynau Twf Poblogaeth a Thai yn darparu asesiad mwy manwl o'r senarios sy'n cael eu hystyried a'r cyfiawnhad fel yr opsiwn twf a ffefrir.

7.24 Fel sy'n ofynnol yn ôl y Llawlyfr Cynlluniau Datblygu (Rhifyn 3), ychwanegwyd lwfans o 10% i'r gofyniad tai i ganiatáu dewis a hyblygrwydd, oherwydd gallai fod amgylchiadau anrhagweladwy sy'n effeithio ar gyflawni dyraniadau tai. Gallai'r lwfans hyblygrwydd hwn fod yn destun newid yn yr 2RLDP Adnau yn dilyn dyraniad safleoedd yn unol â'r Strategaeth a Ffefrir.

7.25 Caiff y ddarpariaeth o 7,425 o anheddiadau eu cyflawni gan nifer o gydrannau yn y Cyflenwad Tir Tai, fel a amlinellwyd yn Nhabl 3 isod. Mae gwybodaeth fanwl am sut y mae pob un o'r cydrannau wedi'u canfod yn y Papur Sylfaen Tystiolaeth Targed Cyflenwad Tir Tai a Thai Fforddiadwy.

Table 3: Cyfrifo Gofyniad Tai

7.26 Bydd yr 2RLDP Adnau yn cynnwys llwybr tai, a fydd yn amlinellu'r cyfraddau cyflawni tai disgwyliedig dros gyfnod y cynllun. Bydd hwn yn sail ar gyfer monitro cyflawniad y cydrannau o gyflenwad tai yn erbyn targedau yn y dyfodol.

7.27 Nod y Cyngor yw sicrhau bod gan bawb yn y Fwrdeistref Sirol fynediad at gartref o safon sy'n bodloni gofynion tai ac mae darpariaeth amrywiaeth o dai sy'n fforddiadwy i'r boblogaeth leol yn hollbwysig wrth gyflawni hyn. Mae diffyg tai fforddiadwy yn broblem sylweddol sy'n wynebu preswylwyr yn y Fwrdeistref Sirol. Yn wir, mae Asesiad y Farchnad Dai Leol 2018 (LHMA) yn nodi bod diffyg o 282 o unedau fforddiadwy y flwyddyn ar gyfer cyfnod o bum mlynedd 2018-2023.

7.28 Mae'r targed o leiaf 1,360 o anheddau fforddiadwy yn cyfleu nifer yr unedau y disgwylir gallu eu cyflwyno ar draws y Fwrdeistref Sirol drwy ddefnyddio rhwymedigaethau ac amodau cynllunio. Mae'r cydrannau sy'n cyfrannu at y targed tai fforddiadwy wedi'u crynhoi yn Nhabl 4 isod. Mae manylion pellach yn y Papur Sylfaen Tystiolaeth Cyflenwad Tir Tai a Thai Fforddiadwy.

Table 4: Cyfraniad at Darged Tai Fforddiadwy

7.29 Caiff polisi sy'n amlinellu trothwyon meintiau mawr iawn a thargedau ardaloedd penodol yn seiliedig ar asesiad cadarn o ddichonoldeb ei gynnwys yn yr 2RLDP Adnau yn dilyn cwblhau diweddariad o'r Asesiad Dichonoldeb Tai Fforddiadwy. Caiff yr 2RLDP Adnau ei gefnogi hefyd gan LHMA wedi'i ddiweddaru sy'n adlewyrchu newidiadau diweddar i fethodoleg yr LHMA.

7.30 Mae symud tuag at foddau cynaliadwy o gludiant yn hanfodol er mwyn mynd i'r afael â phroblemau newid yn yr hinsawdd, tagfeydd a materion ansawdd aer. Er mwyn mwyafu'r cyfleoedd hyn, bydd yn rhaid i'r holl gynigion datblygu ddangos y cydymffurfiwyd wrth yr hierarchaeth cludiant cynaliadwy.

7.31 Mae Llwybr Newydd, Strategaeth Trafnidiaeth Cymru 2021 newydd, yn gosod targed uchelgeisiol o 45% ar yr holl deithiau i'w gwneud drwy ffyrdd cynaliadwy erbyn 2045. I fod o fewn unrhyw gyrraedd o gyflawni'r nod hon, mae'n hanfodol bod cynlluniau datblygu yn cynnwys polisïau uchelgeisiol sy'n mynd i'r afael â'r mater hwn. Fodd bynnag, ar hyn o bryd, mae diffyg gwybodaeth sy'n hygyrch i lywio ble'r ydym ni ar hyn o bryd a pha mor bell i lawr yr heol rydym ni tuag at newid moddol. O ganlyniad, nid yw'r Strategaeth a Ffefrir yn cynnwys targed sy'n seiliedig ar Fwrdeistref Sirol benodol. Yn hytrach, mae'n ceisio cyflawni newid yn unol â thargedau cenedlaethol.

7.32 Mae angen gwelliannau i'r system drafnidiaeth, ar gyfer moddau cynaliadwy ac mewn perthynas â'r isadeiledd priffyrdd presennol, er mwyn galluogi cyflawni lefelau arfaethedig o dwf y Strategaeth a Ffefrir. Er bod y Strategaeth yn canolbwyntio ar gludiant cynaliadwy ac yn ceisio lleoli datblygiad sy'n agos i ganolfannau cludiant a gwasanaethau, bydd angen gwelliant i'r isadeiledd Cludiant er mwyn sicrhau hygyrchedd. Mewn rhai achosion, bydd hyn yn cynnwys gwelliannau i'r rhwydwaith presennol o briffyrdd gan fod trafnidiaeth gynaliadwy yn defnyddio'r rhwydwaith o briffyrdd yn ogystal â'r llwybrau ymrwymedig at ddibenion bysus a theithio llesol. O ganlyniad, mae'r Strategaeth a Ffefrir y ceisio gwella isadeiledd cludiant lle bydd yn cynyddu hygyrchedd ac yn hwyluso cludiant cynaliadwy.

7.33 Fel rhan o weithredoedd i wella'r isadeiledd trafnidiaeth, mae'n hanfodol bod yr 2RLDP yn cynyddu cyfleoedd i addasu hen linellau rheilffyrdd ar gyfer datblygiadau sy'n gysylltiedig â thrafnidiaeth, gan gynnwys eu datblygu at ddibenion cludiant teithwyr. O ganlyniad, mae'n bwysig amddiffyn hen lwybrau rheilffyrdd rhag datblygiad a allai beryglu eu defnydd yn nhrafnidiaeth y dyfodol. Yn ogystal â hyn, mae'r Cyngor yn parhau i gefnogi ail-sefydlu gwasanaethau teithwyr dwy o'u hen reilffyrdd a bydd yn ceisio hyrwyddo'r rhain drwy'r rhaglen Metro Plus.

7.34 Mae'r Cyngor yn gwbl gefnogol o unrhyw gynigion sy'n hyrwyddo datblygiad Metro De-ddwyrain Cymru. Yn ogystal, bydd y Cyngor hefyd yn gweithio i gefnogi cynigion sy'n gwneud y rhwydwaith trafnidiaeth presennol yn fwy cadarn ac yn fwy effeithiol ar gyfer trafnidiaeth gynaliadwy. Cydnabyddir y gall gwelliannau trafnidiaeth a llwybrau trafnidiaeth newydd gymryd cyfnod sylweddol o amser i gael eu cyflawni ac, o ganlyniad, mae'n hanfodol bod y Cyngor yn amddiffyn llwybrau gwelliannau trafnidiaeth strategol rhag datblygu priodol a allai beryglu eu defnydd at ddibenion trafnidiaeth yn y dyfodol.

7.35 Bydd ail-sefydlu hierarchaeth ffyrdd yn hwyluso'r defnydd effeithiol o'r rhwydwaith priffyrdd drwy sicrhau y caiff traffig ei sianelu i'r llwybrau mwyaf priodol er mwyn cynnal yr amgylchedd, amwynderau ac amodau diogelwch mwyaf priodol. Bydd cynnal rhwydwaith o briffyrdd effeithiol a diogel yn cynorthwyo gwasanaethau cludiant cyhoeddus ar ffurf bysus, gan gynnal eu hamlder a sicrhau eu bod yn rhedeg yn unol â'r amserlen.

7.36 Mae'r Strategaeth a Ffefrir yn ceisio lleoli datblygiadau'n agos iawn i brif nodau trafnidiaeth gynaliadwy a chanolfannau gwasanaeth yn y Fwrdeistref Sirol. Mae manwerthu yn elfen hanfodol o swyddogaethau mae'r prif ganolfannau gwasanaeth yn eu cyflawni ac o ganlyniad, bydd yr hierarchaeth fanwerthu ar gyfer y Fwrdeistref Sirol yn dylanwadu'n gryf ar leoliad twf ar draws y Fwrdeistref Sirol. Yn ogystal, mae Cymru'r Dyfodol yn nodi y dylid lleoli prif ddatblygiadau manwerthu a'r sector cyhoeddus yn y prif ganolfannau fel ystyriaeth gyntaf. O ganlyniad, mae'n bwysig y caiff swyddogaethau manwerthu'r prif ganolfannau eu hamddiffyn rhag datblygu amhriodol, wrth ganiatáu hyblygrwydd er mwyn i'r canolfannau barhau i ffynnu.

7.37 Mae'n ofynnol bod y Cyngor yn ystyried anghenion y gymuned Sipsiwn a Theithwyr wrth baratoi cynlluniau datblygu. Mae'n ofynnol i'r Cyngor baratoi Asesiad o Lety i Sipsiwn a Theithwyr (GTAA) a fydd yn llywio'r broses honno. Yn anffodus, nid oedd hi'n bosib cwblhau GTAA y Cyngor mewn pryd ar gyfer yr ymgynghoriad Cyn-Adneuo, felly mae'r Strategaeth a Ffefrir yn cynnwys ymrwymiad i ddiwallu anghenion Sipsiwn a Theithwyr drwy'r GTAA.

7.38 Mae'n ofyniad statudol i'r Cyngor gadw banc tir 10 mlynedd o gronfeydd o fwynau a ganiateir drwy gydol cyfnod y cynllun. I wneud hyn, bydd y Cyngor yn amddiffyn y cronfeydd wrth gefn presennol rhag datblygiad amhriodol ac yn sicrhau y caniatawyd cronfeydd digonol i ddarparu cronfeydd gwerth 25 mlynedd a fyddai'n sicrhau tic banc 10 mlynedd ar ddiwedd cyfnod y cynllun. Yn ogystal â hyn, bydd y Cyngor yn annog defnyddio ac ailddefnyddio gro eilaidd cymaint â phosib.

7.39 Gwneir darpariaeth ar gyfer isadeiledd gwastraff dŵr ar lefel isranbarthol ac, felly, nid yw'r Strategaeth a Ffefrir yn gwneud darpariaeth ar gyfer isadeiledd gwastraff. Fodd bynnag, mae'n bwysig bod y Strategaeth a Ffefrir yn cynnwys polisïau trosfwaol sy'n hwyluso darpariaeth elfennau o'r hierarchaeth.

7.40 Mae Diagram Allweddol y Strategaeth a Ffefrir isod. Dylid nodi bod y Diagram Allweddol yn gynllun awgrymedig a'i fod yn dangos dyraniadau penodol wedi'u hamlinellu yn y Strategaeth a Ffefrir yng nghyd-destun y Fwrdeistref Sirol. Nid yw'r diagram ar raddfa benodol nac yn seiliedig ar Sylfaen Map Arolwg Ordnans. O ganlyniad, mae'r dyraniadau a nodwyd arno yn awgrymedig ac nid ydynt yn cyfeirio at safleoedd na llwybrau penodol.

Figure 5 - Diagram Allweddol Strategaeth a Ffefrir